ദൂരത്ത് കേട്ടാമതി
മണല് പരപ്പിലെ തരികളോരോന്നും
മോഹം കൊണ്ട് തുടിക്കാന് തുടങ്ങും
തെന്നലിന്റെ അലകള്വന്ന്
മൃദുവായൊന്ന് തൊട്ടാമതി
മണ്കിടക്ക വിട്ടെഴുന്നേറ്റ്
മരുപ്പച്ചകള് നൃത്തം ചവിട്ടാന് തുടങ്ങും
വിരല് പിടിച്ച്
പെരുവിരലിലൂന്നിച്ച്
കാറ്റൊന്ന് വട്ടം കറക്കിയാമതി
മരുഭൂമിയിലുന്മാദം
മണല് ചുഴികളാവാന് തുടങ്ങും
പൊടുന്നനേയാവും
ആഘോഷമുടന് നിര്ത്തി
മടങ്ങിയെത്തണമെന്ന്
അകലെനിന്നെങ്ങാന്
അറിയിപ്പ് വന്നപോല്
കിനാപമ്പരങ്ങളില് കാറ്റഴിയും
മടങ്ങിപ്പോകുമ്പോള്
മണ്ണിന്റെ വിങ്ങലില്
ഒരുപങ്കതോര്മ്മയ്ക്കായ് കൊണ്ടുപോകും
കാറ്റിവിടെയെന്നും പാടുന്ന പാട്ടില്
കേട്ടുമറന്ന ഏതോ വിഷാദഗാനം
നനഞ്ഞു നില്പുണ്ടെന്ന്
നിനക്കു ഞാനെഴുതിയതതുകൊണ്ടാണ്
