സംസ്കരണം

ചത്താല്‍
‍കിടന്ന് നാറുമ്മുമ്പ്‌
കുഴിച്ചിടുന്നവന്‌ കൂലിയായി
നാലു കാശ്‌
സ്വരുക്കൂട്ടി വച്ചതും
കട്ടോണ്ട്‌ പോയിരിക്കുന്നേതോ
ഒരുമ്പെട്ട കാലന്മാര്‍..!

അങ്ങനെയാണ്‌ പിന്നെ
പകരത്തിനഞ്ചാറ്
കഴുകന്മാരെപ്പോയി
കെണിവച്ച്‌ പിടിച്ച്‌
കൊണ്ടുവന്നത്‌.

ഒടുക്കം
അതുവരെ കാത്താല്‍
അവന്മാരുടെ ശവവും
ഞാന്‍ തന്നെ തിന്നേണ്ടിവരുമോന്ന്
വര്‍ണ്ണ്യത്തിലൊരാശങ്ക
ആളിപ്പിടിച്ചാണ്‌
ഇരുട്ടും വരെ കാക്കാതെ
ഇപ്പൊഴെ അങ്ങ്‌
മലര്‍ന്ന് കിടന്നുകൊടുത്തത്‌.

ഒരറ്റം തൊട്ടങ്ങനെ
അടിച്ചുവാരി വരട്ടേന്ന്....

അഴുക്കുണ്ടേ
പത്തുനാപ്പത്‌ കൊല്ലത്തോളം...

വെളുക്കും മുമ്പ്‌ തീര്‍ക്കണേ
എന്റെ വിശപ്പിന്റെ കഴുകന്മാരേ എന്ന്
ഉമ്മറത്തിരുന്നാരോ
ഉറക്കം തൂങ്ങിയത്‌ മാത്രം
എപ്പൊ കെട്ടുവെന്ന്
എന്നോട്‌ ചോദിക്കരുത്‌.